எனக்கும் பிடித்த கவிதை

விகடனில் சுஜாதா கொடுத்திருந்த எ.பி.க.வை ரசித்தேன்.

கடைசிப் பக்கங்கள்
கிழிந்துபோன
துப்பறியும் நவீனத்தை
தெரியாமல் எடுத்துப்
படித்திருக்கிறீர்களா?
அதுதான் வாழ்க்கை!

-- அப்துல் ரகுமான்.

பாரதியாரின் 'சந்திரிகையின் கதை'யை அப்படித்தான் படித்தேன்!

அடி, அடி....நெத்தியடி!

மன்மோகன் சிங்கிற்கு மணி சங்கர அய்யர் கொடுக்கின்ற குடைச்சல் போதாதென்று அவரது சகோதரர், புகழ்பெற்ற பொருளாதாரக் கட்டுரையாளர் (columnistன்னா என்னப்பா?) சுவாமிநாதன் அங்கலேசரிய அய்யர் நாக்கைப் பிடுங்குவது போல் நாலு (இல்லை பத்து) கேள்விகள் கேட்டிருக்கிறார். இங்கே படிக்கலாம்.

மெல்ல சமசுகிரதம் இனி சாகும்!

தமிழைக் காப்பாற்ற வெளிநாடுவாழ் தமிழர்கள் இருக்கிறார்கள்! ஆனால் சமசுகிரதத்திற்கு? சென்னையிலுள்ள குப்புசாமி சாஸ்த்ரி ஆராய்ச்சி நிறுவனம் சமசுகிரத ஒலைச்சுவடிகளைக் காப்பாற்ற முயற்சி செய்துவருகிறது. முடிந்தால் நீங்களும் அவர்களுக்கு உதவலாம். இவர்களைப் பற்றிய 'இந்து' செய்திக்கட்டுரை இங்கே.

வலையொலி பரப்பி...ஓ போடுங்கள்!

பாரீஸ், நான் உன்னைக் காதலிக்கிறேன்!

ஐயா, பிரஞ்சுக்காரர்களே உங்களுக்கு இரக்கமேயில்லையா? சினிமா என்றால் தமிழ் நாட்டில் எடுப்பதுபோல் படுமட்டமாக எடுக்கவேண்டும். அப்படியில்லாமல் நீங்கள் உங்களின் Paris, je t'aime போன்ற திரைப்படங்களின் மூலம் இயற்கைக்கும் அம்மாக்களுக்குமே உரித்தான அதிசிய படைப்புத்திறனை அபகரிக்கலாமா? உங்கள் படங்களைப் பார்த்துவிட்டு நான் எப்படி சிவாஜி போன்ற குப்பைகளுக்காக ஆவளுடன் காத்திருக்கமுடியும்?

சரி போனால் போகிறது, லைலா பேக்தி போன்ற ரதிகள் உங்கள் நாட்டில் நிஜமாகவே இருக்கிறார்களா? நான் கூகுள் சொல்வது போல் அட்லாண்டிக் சமுத்திரத்தை நீந்திக்கடந்து வந்தால், அவளைச் சந்திக்கமுடியுமா?

நந்திகிராம் பயங்கரம்

பெரிய குட்டிச்சுவர்!

அனில் அம்பானியின் சபக் நிறுவனம் 'big adda' என்னும் 'சமூக உறவுகள்/தொடர்புகள்' தளத்தை (அதாவது கடலை போடுமிடம்!) ஆரம்பித்துள்ளது. 'adda' என்றால் குடில், கூடுமிடம் என்று பொருளாம். நம்ம ஊரில் குட்டிச்சுவர் என்போம். 'big' என்பது அம்பானியின் பன்பலை அலைவரிசைகளின் பெயரும்கூட. ஆர்கூட்டிலேயே பழியாய்க்கிடந்து கூகிளின் வருமானத்தை அதிகரித்துவரும் இந்தியர்கள் இனி அனில் அம்பானிக்கு சம்பாதித்துக் கொடுக்கலாம்.

இவர்கள் 'big flicks' என்னும் இணைய திரைப்படத்தளத்தையும் ஆரம்பிக்கப் போகிறார்களாம். இது நல்ல முயற்சிதான் என்றாலும் எவ்வளவு வெற்றிபெறுமென்று தெரியவில்லை. தமிழில் ஜி.வி. திரைப்பட நிறுவனம் ஆரம்பித்த திரைப்படத்தளம் வெற்றிபெற்றதாகத் தெரியவில்லை. வெட்கங்கெட்ட தமிழன் (நானும் தான்!) திருட்டுத்திரைப்படத் தளங்களில் காசு கொடுத்தும், டாரண்ட்சுகளிலும், நிரோஜன் சக்திவேல் உள்ளிட்டோரின் கூகிள் 'அன்பளிப்புகளிலும்' மஜா பண்ணிக் கொண்டிருக்கிறான்.

உயிர்க்களஞ்சியம்

இரண்டு அறக்கட்டளைகளின் முதலீட்டில் பல கல்வி நிறுவனங்கள் இணைந்து உயிர்க்களஞ்சியம் என்னும் திட்டத்தை அறிவித்துள்ளன. இக்களஞ்சியம் பூமியிலுள்ள அனைத்து உயிரினங்களையும் பற்றிய விவரங்களை தொகுத்து வழங்குவதாகும். இணையம் வழியாக அனைவருக்கும் இலவசமாக இந்த விவரங்கள் கிடைக்கும். இந்த முயற்சி வெற்றிபெற வாழ்த்துக்கள்!

முதலில் ஆங்கிலத்தில் உருவாகவிருக்கும் இது பிற்காலத்தில் பிற மொழிகளிலும் கொண்டுவரப்படும். அதன் தமிழ் பதிப்பிற்கு நீங்களும் பங்களிப்பீர்கள் தானே?

வலை விடு தூது!

வலைப்பதிவு என்பது ஒருவரின் தனிப்பட்ட புலம்பல் என்பதுபோய் இப்போதெல்லாம் சில பதிவுகள் இந்தியாவின் தலைவிதியையே நிர்ணயிக்கும் அளவுக்கு வளர்ந்துவிட்டன! நாரயண மூர்த்தி குடியரசுத் தலைவராக வருவதற்கு பெரிய வேட்டு வைத்தது சுர்முரி என்கிற கூட்டுப்பதிவுதான்!

எனக்கு தெரிந்த சில சமூகப்பொறுப்புள்ள பதிவுகளை கீழே தருகிறேன். இப்பதிவுகளில் சில பத்திரிக்கைகளாலும் சேரியமாய் எடுத்துக்கொள்ளப்படுகின்றன. இவர்கள் தமக்கே உரிய தனித்தன்மையோடு செய்திகளையும் சில சமயம் பிரச்சாரங்களையும் வெளியிடுகிறார்கள்! நீங்கள் இதுபோன்ற பிற உருப்படியான பதிவுகளைப் படித்தால் எனக்குத் தெரியப்படுத்தவும்.

1. சுர்முரி.
2. தேச நலம்.
3. இந்தியா அண்கட்.
4. ஸ்பார்க்ஸ்.
5. சாஸ்வத்.
6. பத்ரி.
7. ரவி.
8. கிரிஷ்.

புத்தாண்டு வாழ்த்துக்கள்

அனைவருக்கும் எனது இனிய புத்தாண்டு வாழ்த்துக்கள்!

சீந்து

சென்னையிலிருந்து வெளிவரும் 'இந்து' ஆங்கில நாளிதழ் ஒரு நடுநிலையற்ற பத்திரிக்கை என்று நான் பல வருடங்களாகவே கருதி வந்திருக்கிறேன். அவர்களின் இடது சார்பும், இந்து (மதம்) விரோதப் போக்கும் என்னை முகம் சுளிக்க வைத்திருக்கின்றன. என்னைப் போன்றே வெறுத்துப்போன ஒருவர் 'சீந்து - சீன இந்து' என்ற பதிவில் அந்நாளிதழ் வெளியிடும் நடுநிலையற்ற செய்திகள் சிலவற்றை சேகரித்து வருகிறார். முழுப் பட்டியலுக்கு இங்கே செல்லவும்!

ஓலிச்சித்திரம்

மதுரைத் திட்ட மடலாடர் குழுவில் பேராசிரியர் கல்யாண் பாட்பசார் தளத்தில் 'சிவகாமியின் சபதம்' கேட்கக் கிடைப்பது பற்றி எழுதியிருந்தார். அங்கே சென்றதில் 'மகாபாரதம் பேசுகிறது'வும் கிடைத்தது.

தமிழ் படைப்புகளை ஒலிச்சித்திர வடிவில் கொடுப்பது நல்ல முயற்சி. தமிழுக்கு பங்களிக்க எளிதான வழி! மற்றபடி எல்லா தமிழ் புத்தகங்களையும் ஓலிப்புத்தகமாக வழங்க பதிப்பகங்கள் முன்வரவேண்டும். அமெரிக்க நெடுஞ்சாலைகளில் தனியாக வாகனம் ஓட்டிச்செல்பவர்கள் ஒலிப்புத்தகங்கள் கேட்பது வழக்கம்.

தமிழகத்தில் பல பேர் பன்னிரண்டாம் வகுப்புக்குமேல் தமிழை பெயர்ப்பலகைகளிலும், திரைப்பட விளம்பரங்களிலுமே படிக்கிறார்கள். என்னுடைய பல நன்பர்களால் இப்போது தமிழில் படிக்கவே முடிவதில்லை! மாறாக தமிழ்நாட்டுக்கு வெளியில் படித்ததனால் தமிழ் படிக்கமுடியாமல் ஆங்கில பொழிப்பெயர்ப்புகள் கிடைக்குமா என்று தேடுப்படிப்பவர்கள்் பலபேர் இருக்கிறார்கள். ஒலிப்புத்தகங்கள் அவர்களுக்கு மிகவும் பயன்படும்.

அய்யா சாமிகளே!, செய்தி படிக்க விடுங்கப்பா...

நான் தினமும் இணையத்தில் குறைந்தது பத்து செய்தித் தளங்களுக்காவது செல்கிறேன். ஆனால் உன்னை படிக்க விடுகிறேனா பார் என்று ஒரு கூட்டம் இங்கே அலைந்து கொண்டிருக்கிறது. இவர்கள் ஒன்று அவர்களுடைய தளத்தில் செய்திகளை எவருக்கும் தெரியாத இடத்தில் ஒளித்து வைத்திருப்பார்கள். (எ.கா: என்.டி.டீவி, டி.என்.எ) அல்லது குட்டிக்கரணம் அடித்தாலும் லினக்சில் படிக்கமுடியாதபடியான எழுத்துரு மற்றும் பக்க அமைப்பு வைத்திருப்பார்கள். (எ.கா: தினமலர், தினமணி மற்றும் எல்லா தமிழ் நாளிதழ்கள்!)

இந்நிலையில் தட்சுதமிழ் தளத்தை ஒருங்குறிக்கு மாற்றியவர்களுக்கு மட்டும் இந்த கோடைக் காலத்தில் தண்ணீர் பிரச்சனை வராமலிருக்க வேண்டிக்கொள்கிறேன்! விகடன் ஒருங்குறியில் இல்லாவிட்டாலும் அவர்களின் எழுத்துரு லினக்சில் தெரிவதாலும், நன்றாக இருப்பதாலும் அவர்களுக்கு டாங்கர் லாரி தண்ணிர் மட்டும் கிடைக்கட்டும்.

படிக்க முடியாதவனாகிவிட்ட (?!) எனக்கு இணையத்தில் இலவசமாக ஒளிபரப்பப்படும் சில செய்தித் தொலைக்காட்சிகள் ஓரளவுக்கு ஆறுதல். (என்.டி.டீவி, ஐ.பி.என், தூர்தர்சன்) ஐயா கலாநிதி மாறனே, சன் செய்தியையும் இதே மாதிரி இலவசமா ஒளிபரப்பினா தம்பியை முதலமைச்சாராவே ஆக்கிடலாமில்ல? முடிக்கிறதுக்கு முன்னாடி ஒரேயொரு கேள்வி. கே.டீவின்னு அருமையான தமிழ் பெயர் வைத்திருப்பதில் எழுத்துப்பிழை இருப்பதுமாதிரி தெரிகிறதே. குரங்கு டீவின்னா கு.டீவின்னு தானே வரனும்?

ஆசிய நாகரீகங்கள் அருங்காட்சியகம்

சமீபத்தில் சிங்கப்பூர் சென்றிருந்தபோது அங்குள்ள ஆசிய நாகரீகங்கள் அருங்காட்சியகத்தைப் போய் பார்த்தேன். அருங்காட்சியகம் என்றாலே போரடித்து தும்ம வைக்குமிடமென்றில்லாமல் நேர்த்தியாகவும் நவினமாகவும் இருந்தது. சிங்கப்பூர் செல்பவர்கள் கட்டாயம் பார்க்கவேண்டிய இடம்.

அதற்கு முந்தைய வாரம் தஞ்சை பெரிய கோயிலுக்கும், சரசுவதி மகால் உள்ளிட்ட இடங்களுக்கும் சென்றிருந்தேன். மிக்க மனநிறைவளித்த பயணமென்றாலும் இரண்டு விசயங்கள் நெருடச்செய்தன.

1. வேலூர் கோட்டையிலுள்ள அகழியைக்கூட ஓரளவுக்குப் பராமரிப்பவர்கள் பெரிய கோயில் அகழியை சீரழித்தது ஏனென்று தெரியவில்லை. அங்கே உள்ளேயிருப்பது முன்னால் இந்தியப் பிரதமரைக் கொன்ற அதிமுக்கியமானவர்கள், இங்கிருப்பதோ உதவாக்கரை சிவன் மட்டும்தான் என்பதாலா?



2. சரசுவதி மகால் நூலகத்திலிருக்கும் ஓலைச்சுவடிகள் மிகவும் அரிய செல்வங்களென்றாலும், இந்த சிறிய நூலகத்தைப் பற்றியா இவ்வளவு தம்பட்டம் அடித்துக்கொள்கிறோம்? சப்பென்றாகிவிட்டது!

ஜூஸ்ட் (ரசப்படுத்தல்?!)

ஸ்கைபை உருவாக்கிய சென்ஸ்டிராம் மற்றும் ஃப்ரைஸ் ஆகியோர், ஜூஸ்ட் என்னும் இணைய தொலைக்காட்சித் தளத்தை உருவாக்கியிருக்கிறார்கள். இது நேசவலை மற்றும் சூல்ரன்னர் தொழில்நுட்பங்களை பயன்படுத்துகிறது. இங்கு யூடியுப் போன்று எல்லோரும் பதிவேற்ற முடியாதென்பதால் காப்புரிமைகளுக்கு வேட்டு வைக்க முடியாது! சென்ற வாரம் யூடியுபிலிருந்து தங்களின் படங்களை அகற்றச்சொன்ன வயோகாம் நிறுவனம் அவற்றை ஜூஸ்டில் வெளியிட முடிவு செய்துள்ளது. தமிழக தயாரிப்பாளர்களும் விழித்துக்கொண்டால் நல்லது!

சூல்ரன்னர் தொழில்நுட்பம் மொசில்லவுடையாதாகும். இதனை பயன்படித்தும் சாங்பேர்டு முயற்சி வெற்றிபெற்றால் ஐடியூன்ஸை லினக்ஸுக்குத் தராமல் அழிச்சட்டியம் செய்யும் ஆப்பில் நிறுவனத்துக்கு பாடம் புகட்டலாம்!

ரெய்ல்ஸில் விளையாடக் கற்றுக்கொள்ளுங்கள்!

பணி நிமித்தமாக ரூபி ஆன் ரெய்ல்ஸ் என்னும் வலை கட்டமைப்பு மென்பொருளை படித்துக்கொண்டிருக்கிறேன். சி, சி++, மைசீக்வல் என்று இணையத்தின் புறங்கடையிலிருந்த என்னை ரெய்ல்ஸில் விளையாடுடா என்று வராண்தாவுக்கு அழைத்து வந்திருக்கிறார்கள். நான் பயன்படுத்தும் சில சுட்டிகளைத் தருகிறேன். யான் பெற்ற இன்பம் (துன்பம்?) பெறுக இவ்வையகம்!

1. ரூபி ஆன் ரெய்ல்ஸோடு உருளுங்கள்!
2. புத்தகங்கள். (தூக்கத்திற்கு முன்)
3. விக்கி. (தூக்கத்திற்கு பின்)

மாற்று! - உரக்க சிந்தித்தல்!

சில நாட்களாக, மாற்று! புண்ணியத்தில் தமிழ் வலைப்பதிவுகளைப் படித்ததில் எனக்குத் தோன்றியவை:

1. தமிழில் எக்கச்சக்கமான பதிவுகள் வருகின்றன என்று நினைத்திருந்தேன். ஆனால் மாற்று! தினசரி சேகரிக்கும் (150 பதிவர்கள் எழுதும்) சுமார் 20 பதிவுகளில் நல்ல பதிவுகள் ஐந்துக்கு மேல் தேறுவதில்லை! தமிழில் எழுதுபவர்கள் தரமாக எழுதுவதில்லை என்று தோன்றுகிறது.
2. மாற்றுக்கு பங்களிப்போரின் சொந்தப் பதிவுகள் நன்றாக இருக்கின்றன.
3. தமிழ்மணத்தில் மானாவாரியாக அடித்துக்கொள்கிறார்கள் என்று ரவி சொல்லக்கேட்டிருக்கிறேன். அது முற்றிலும் உண்மை என்பது தெரிகிறது. (எரிகிற நெருப்பில் நானும் கொஞ்சம் என்ணெய் ஊற்றிவிட்டுவந்தேன் என்பது வேறு விஷயம்!) மாற்று போன்ற முயற்சிகள் வெற்றிபெறுவது தமிழ் வலைப்பதிவு உலகத்துக்கு நல்லது.

பாவம் மணிப்பூர்

பஞ்சாப், உத்தராகண்ட் மாநிலத் தேர்தல்கள்்் பற்றி இந்தியாவின் தமாஷா (செய்தி!) ஊடகங்களில் அடித்துக் கொள்கிறார்கள். பிற்பாடு வரப்போகும் உத்தர பிரதேசம், குஜராத் தேர்தல்கள் பற்றி கூட செய்தி வெளியிடுகிறார்கள். ஆனால் மணிப்பூர் தேர்தல் பற்றிய செய்திகளை சீந்துவாரில்லை. நாமாவது மணிப்பூர் பத்திரிககை் இ-பாவ் படித்து மணிப்பூர் இந்தியாவில்தான் இருக்கிறதென்று நம்மை நாமே ஏமாற்றிக் கொள்வோம்!

பசுமை விகடன்

விகடன் குழுமம் ஆரம்பித்திருக்கும் 'பசுமை விகடன்' பத்திரிக்கை மிகவும் வரவேற்கத்தகுந்த முயற்சியாகும். விவசாயத்திற்கும் எனக்கும் மிகவும் தூரமென்றாலும் விரும்பிப்படிக்கிறேன். சுற்றுலா, விவசாய வரலாறு மற்றும் துணுக்குகள் பகுதிகள் எல்லோரும் ரசிக்கும்படி இருக்கின்றன.

"சினிமாக்காரி படம் போட்டு ஆனந்த விகடன் குட்டிச்சுவராப் போச்சு!" என்று என் பாட்டி அங்கலாய்த்தாலும் விகடனை வாரம் தவறாமல் படிக்கிறேன். சில காலமாக வரும் 'வெளிச்சம்: உலக சினிமா' பகுதி சிறப்பாகவுள்ளது. நேரமிருந்தால் நான் சமீபத்தில் ரசித்த பின்வரும் படங்களை நீங்களும் பாருங்களேன்!

1. சில்ரன் ஆப் ஹெவன்.
2. தி ரிடர்ன்.
3. தி குக்கூ.
4. மூன்று நிறங்கள்: நீலம்.

விபிளே!

சில மாணவர்கள் சேர்ந்து ஆரம்பித்திருக்கும் விபிளே! என்னும் இணைய வானொலி ஒரு அருமையான தொடக்கமாகும். சிறப்பான இசைத்தொகுப்பு, நேயர் விருப்பம், முக்கியமாக காப்புரிமைகளை மீறாத தளமென்று கலக்குகிறார்கள். தமிழ், மலையாளம் மற்றும் ஹிந்தியில் அருமையான பாடல்களைக் கேட்கலாம்.